الهندسة المدنية
قسم الالف شيت : قسم مدنى او قسم الشعب زى ما بيقولوا..😂
مفاهيم غلط عن القسم ...؟
قسم مدنى قسم الشعب بس مش اسهل قسم في الكليه ولا الكلام ده بالعكس من اصعب الاقسام فى الكلية و من اكتر الناس اللى بتتعب دراسياً و عمليا
و فعلا القسم محتاج مذاكرة كتير بسبب التسليمات و الشيتات اللى بتطلب منك باستمرار
-الدراسة فى القسم .....
اولا الدراسه في قسم مدني بتتطور كل سنة
أول سنة...؟
بتدرس حاجات بشكل عام كتير ومش كلها تخصص مدني وبتبقي سنه غريبه وبتحس انك مش فاهم بيحصل فيك ايه ولا بتعمل ايه... بتدخل قاعات الرسم ترسم في ترع وقطاعات استيل وطرق وانت مش مستوعب هتعمل بيهم ايه بس عموما هتعرف في السنين الجايه....
اما عن باقي المواد ف هتدرس...
- رياضة
- ميكانيكا
- فيزياء
( زى ما قولنا مواد مش تبع القسم )
وبتدرس كمان...
- structure
- مساحه
- الرسم
- ماتريال
( مواد محورية الي نقدر نعتبرهم مواد القسم )
تاني سنة...؟
بتحس ان سنه اولي كانت لعب عيال بتبدأ تدخل في مواد مدني و بتبقي سنه متعبة وصعبه شويه ودراسه مش كتسليمات بمعنى اصح...
و احنا بنعتبر ان سنه تانيه في مدني هى بداية الجد
بتبدأ تدرس مواد فى التخصص بشكل كبير زي..؟
- fluids
- الخرسانه
- ري
- structure
- الماتيريال
- المساحه
تالت سنه...؟
(اسمها العلمي ليفل الوحش)💪😀
بتبدا الصعوبة تكبر و الموضوع يبقى متعب و تحس فعلا يعنى ايه مدنى.. انت هتبقي في الاسبوع بتسلم اكتر من شيت و لوحة وعليك اكتر من كويز والاسبوع يجر اسبوع والدنيا هتكون متعبة جدا...
انت هتدرس فى سنة تالتة...؟
- Soil
- structure
- هيدروليكا
- خرسانه
- استيل
- ري
رابع سنة...؟
دي سنة المشروع انت خلاص هتبقي اتعودت و هتكون عرفت الدنيا ماشية ازاى و مش هيهمك لو هتسلم فى اليوم 100 تسليمة..
وهتدرس...؟
- خرسانه
- استيل
- ري
- طرق
- هندسه صحيه
- اساسات
- موانئ و ادارة
- مواد المشروع (تختلف علي حسب مشروعك)
فروع الهندسة المدنية...؟
- هندسة الطرق : وتختص بتصميم وإنشاء الطرق وهندسة النقل وهندسة المرور.
- هندسة الادارة والتشييد: وتختص بدراسة الكميات وتنفيذ المنشآت بأقل كلفة ممكنة وأسرع وقت ممكن وإدارة موقع العمل
- هندسة الإنشاءات: وتختص بتصميم وتنفيذ المنشآت المعدنية والخرسانية
- هندسة صحية: وتختص بتصميم وتشغيل أنظمة الصرف الصحي ومحطات المياه.
- هندسة الموانى والمنشآت البحرية: ويختص بتصميم وتنفيذ الموانى والمنشآت البحرية من أرصفة وحواجز أمواج وكذلك سبل حماية الشواطئ
- هندسة الموائع: وتختص بدارسة خصائص السوائل وأثرها على المنشئات "مثل أثر الرياح على المباني أو ضغط المياه على السدود وما إلى ذلك".
- هندسة الري: وتختص بدراسة أساليب التحكم في أنواع الري المختلفة والمنشآت المائية الزراعية.
بس كدة...؟!
لا طبعا مدنى فيه مجالات لا حصر لها ولكن وضحنا الاهم فقط...
طب انا اشتغل ايه فى كل فرع من دول...؟
ليك اكتر من وظيفة
- مهندس تصميم : بتاخد اللوحات من مهندس معمارى و تبدا تصمم المنشأ بجميع تفاصيله علشان نقدر نحقق حلم المعمارى
- مهندس تنفيذ : بتستلم لوحات المعمارى و الانشائى ( اللى المصمم عملها ) و كمان لوحات shop drawing وتبدا تنفذ المبنى على ارض الواقع
- مدير مشروع : مطلوب كنك تبقى عارف كل صغيرة و كبيرة فى الموقع و تقدر تنفذ المبنى فى اسرع وقت و باقل تكلفة و اعلى جودة
- مهندس حصر كميات و شوب دراوينج : بيبقى مطلوب منك تحسب الكميات المطلوبة للمبنى ..يعنى المبنر محتاج خرسانة اد ايه ..محتاج حديد اد ايه و هكذا ...وكمان بيبقى مطلوب منك تعمل لوحات بنسميها shop drawing ديه لوحات بتربط بين مجال التصميم و التنفيذ
( فيه مجالات اكتر من كدة بس ذكرنا الاهم )
فرص العمل...؟
- لازم تبقى متاكد ان قسم مدنى من اكتر الاقسام اللى متاح ليه فرص عمل بسبب كثرة المجالات و الفروع
- وفيه ميزة كمان : مدنى من الاقسام اللى بتسهلك تبدا شغلك الخاص ..يعنى ممكن تشتغل من على النت بس فى التصميم و حصر الكميات ..
- ممكن تفتح مكتب هندسى
من عيوب القسم...؟
كثرة الخريجين ...طبعا كلنا عارفين ان فيه معاهد و كليات خاصة بتخرج مهندسين مدنى و ده بيخلى المرتبات لاسف قليلة و لكن مع اجتهادك و زيادة معلوماتك و مهاراتك هتقدر تفرض على صاحب الشركة يديلك مرتب اعلى
ازاى اكون متفوق في القسم ...؟
- اهم حاجة تحضر و تعمل الشيتات بنفسك و بايدك و بلاش تنقلها لانك كدة بتدرب نفسك على الامتحان ....النجاح فى القسم سهل باذن الله متقلقش ولكن لازم تحاول تجتهد و تفهم انت بتدرس ايه
- لازم تنزل تدريب فى الصيف دايما فى مواقع و فى مكاتب
- لازم تتعلم برامج كتير علشان هتساعدك فى مشروع التخرج و فى الشغل بعد كدة
الخلاصة...؟
مدنى قسم جميل جدا والله و هو بحر فعلا مش مجال صغير و باجتهادك هتقدر تبقى حاجة كويسة باذن الله
